Pou rive konbat dominasyon, eksplwatasyon, eksklizyon ak tout fὸm diskriminasyon fanm ap sibi an Ayiti, epi pèmèt yo devlope kὸ yo ak lespri yo, Solidarite Fanm Ayisyèn-SOFA nan kad misyon li bay tèt li, planifye epi reyalize divès fὸmasyon pou medam yo ak rès popilasyon Ayisyèn nan sou anpil tematik, pami yo jistis nan rapò sosyal nan mitan fanm ak gason. Se konsa nan mwa jen 2021 an, ὸganizasyon an te reyalize yon fò masyon pandan 2 jounen nan komin Sen Michèl, depatman Latibonit, pou popilasyon an espesyalman medam yo, sou tèm sa: « Jistis nan rapὸ sosyal nan mitan fanm ak gason : yon gwo defi nan batay pou respè dwa fanm yo ». Prensipal objektif fὸmasyon sila se ede medam yo konprann, rann yo pi sansib, sou kesyon rapò debalanse ki genyen nan relasyon fanm ak gason nan sosyete a epi sansibilize plis moun sou diferan fὸm ak kategori vyolans fanm ak tifi ap sibi nan kominote yo ki se rezilta rapὸ debalanse a tou.
Pandan 2 jounen fὸmasyon sa yo, patisipan yo te soulve anpil kesyon. Fὸmatris la, Madan Sharma Aurélien, te divize modil fὸmasyon an, an 2 moso, pou fasilite patisipan yo konprann li pi byen. Premye moso a fè yon travay ekleraj sou de (2) tèm kle : sèks ak rapὸ sosyal nan mitan fanm ak gason (« genre » an fransè), k ap pèmèt moun konprann sous inegalite sosyal nan mitan fanm ak gason yo. Pi lwen fὸmatris la te gade ansanm ak patisipan yo divès kategori ak fὸm vyolans ki ap fèt chak jou ki jou sou fanm yo sou baz sèks yo. Dezyèm moso a li menm li prezante yon seri enstriman legal nan nivo nasyonal ak entènasyonal Ayiti siyen pou fè respekte dwa fanm yo epi yon seri zouti ki se rezilta lit fanm yo mennen an Ayiti tankou lὸt bὸ dlo, ki kapab itilize nan batay kont dominasyon gason sou fanm nan sosyete a. Fὸmasyon sa te chita alafwa sou anpil refleksyon teyorik ak anpil travay pratik. Apre chak moso nan modil la li te fin prezante, fὸmatris la te pèmèt patisipan yo evalye nivo konpreyansyon yo a travè yon seri egzèsis li te ba yo fè nan atelye, yon fason pou deklanche refleksyon nan mitan patisipan yo.
Bὸ kote pa yo, patisipan yo pa t mete dlo nan bouch yo, pou yo denonse yon ansanm pratik sosyete a fè yo viv epi aksepte pou nὸmal. Yo pa t kache non plis angouman yo pou yo aprann plis toujou, sou kijan yo ka mennen batay la pou chavire sitiyasyon sa, epi fè jistis tabli nan rapὸ sosyal yo nan mitan fanm ak gason. Se konsa, nan fen fὸmasyon an, medam yo te pwopoze pou SOFA reprann fὸmasyon sou tèm
sa pou plis moun toujou espesyalman pou gason yo, pou pèmèt travay sansibilizasyon kont vyolans sou fanm nan fèt tou 2 kote yo, sa vle di alafwa bὸ kote fanm ak gason epi bay pi bon rezilta.
